Gwaharddiad rhag gyrru: cytundebau rhwng Prydain Fawr a gwledydd eraill :Cross Stitch – Moduro

Ceir amryw o drefniadau rhwng Prydain Fawr, Gogledd Iwerddon, Iwerddon ac Ynys Manaw sy’n golygu bod y gwledydd yn cydnabod gwaharddiadau rhag gyrru ei gilydd. Yma cewch wybodaeth am y trefniadau hynny rhwng Prydain Fawr a phob gwlad.

Er 11 Hydref 2004, mae Prydain Fawr a Gogledd Iwerddon yn cydnabod gwaharddiadau rhag gyrru ei gilydd. O ganlyniad:

• bydd gyrwyr sydd wedi cael eu gwahardd rhag gyrru yng Ngogledd Iwerddon yn cael eu gwahardd rhag gyrru ym Mhrydain Fawr hefyd
• gellir tynnu trwydded Gogledd Iwerddon yn ôl yn unol â Deddf Traffig y Ffyrdd (Gyrwyr Newydd) 1995
• gellir tynnu trwydded Gogledd Iwerddon yn ôl ar sail anabledd ac anabledd posibl

Daeth amodau tebyg i rym yng Ngogledd Iwerddon ar yr un pryd ag ym Mhrydain Fawr.

Er 23 Mai 2005, mae Prydain Fawr a Gogledd Iwerddon yn cydnabod trefniadau gwaharddiadau rhag gyrru Ynys Manaw. Mae hyn yn golygu:

• bydd gyrrwr sydd wedi’i wahardd rhag gyrru ym Mhrydain Fawr neu yng Ngogledd Iwerddon yn cael ei wahardd rhag gyrru yn Ynys Manaw hefyd
• bydd gyrrwr sydd wedi’i wahardd rhag gyrru gan lys yn Ynys Manaw yn cael ei wahardd rhag gyrru ym Mhrydain Fawr ac yng Ngogledd Iwerddon hefyd nes daw’r gwaharddiad i ben

Nid yw’r canlynol wedi’u cynnwys yn y cynllun hwn:

• gwaharddiad am gronni gormod o bwyntiau cosb
• pwyntiau cosb penodedig
• y Ddeddf Gyrwyr Newydd

Ar 28 Ionawr 2010, cafodd y trefniadau rhwng Prydain Fawr a Gogledd Iwerddon ar gyfer gwaharddiadau rhag gyrru eu hymestyn i gynnwys Iwerddon. Mae hyn yn golygu:

• bydd gyrrwr sy’n preswylio’n arferol ym Mhrydain Fawr ond sydd wedi cael ei wahardd rhag gyrru yn Iwerddon, yn cael ei wahardd rhag gyrru ym Mhrydain Fawr hefyd
• bydd gyrwyr sy’n preswylio’n arferol yn Iwerddon ond sydd wedi cael ei wahardd rhag gyrru ym Mhrydain Fawr, yn cael ei wahardd rhag gyrru yn Iwerddon hefyd
• bydd y trosedd wedi’i ardystio ar y drwydded yrru am bedair blynedd ar ôl dyddiad yr euogfarn

Nid yw’r canlynol wedi’u cynnwys yn y cynllun hwn:

• gwaharddiad am gronni gormod o bwyntiau cosb
• y Ddeddf Gyrwyr Newydd

Mae’r troseddau a gyd-gydnabyddir rhwng Prydain Fawr ac Iwerddon yn perthyn i chwe chategori ymddygiad.

Categorïau ymddygiad:

MR09	Gyrru’n beryglus neu’n ddiofal (boed hynny wedi arwain at farwolaeth, anaf neu berygl difrifol ai peidio)
MR19	Methiant bwriadol i gyflawni’r ddyletswydd a osodir ar yrwyr ar ôl bod yn rhan o ddamwain ffordd (damwain a dianc)
MR29	Gyrru cerbyd o dan ddylanwad alcohol neu sylwedd arall sy’n lleihau neu’n effeithio ar allu meddyliol a chorfforol y gyrrwr, neu wrthod gwneud prawf alcohol a chyffuriau
MR39	Gyrru cerbyd yn gyflymach na’r cyflymder a ganiateir
MR49	Gyrru cerbyd o dan waharddiad
MR59	Ymddygiad arall sy’n arwain at drosedd y pennwyd gwaharddiad ar ei gyfer yn y Wladwriaeth lle cyflawnwyd y trosedd, a hwnnw’n waharddiad o chwe mis neu ragor