Y cynllun gwell beiciwr: hyfforddiant personol ar gyfer beiciau modur :Cross Stitch – Moduro

Gall y cynllun gwell beiciwr eich helpu i gael mwy o bleser wrth yrru eich beic modur. Fe gewch chi hyfforddwr personol a fydd yn eich helpu i gael mwy o fwynhad wrth yrru’ch beic modur. Hefyd, bydd y rhan fwyaf o froceriaid yswiriant beiciau modur yn rhoi disgownt ar yswiriant i chi. Yma cewch wybod sut mae dod o hyd i hyfforddwr a mynd ati i ddilyn y cynllun.

Bydd y cynllun gwell beiciwr:

• yn eich helpu i gael mwy o fudd o yrru’ch beic modur
• yn eich helpu i gael mwy o fwynhad wrth yrru’ch beic modur
• yn rhoi cyfle i chi ddangos eich sgiliau – ac i fod yn gymwys i gael disgownt ar yswiriant o ganlyniad i ddilyn y cwrs hwnnw

Does dim rhaid i chi sefyll prawf.

Ar gyfer pwy mae’r cynllun gwell beiciwr

Cynllun ar gyfer beicwyr modur â thrwydded lawn ac sydd wedi pasio eu prawf yw’r cynllun gwell beiciwr. Mae’n ddelfrydol ar eich cyfer chi:

• os ydych newydd basio’ch prawf
• os ydych yn ailddechrau gyrru beic modur ar ôl rhoi’r gorau iddi am gyfnod
• os ydych am yrru beic modur sy’n fwy pwerus na’r un sydd gennych ar hyn o bryd
• os ydych am wneud yn siŵr eich bod yn gyrru eich beic modur yn iawn
• os ydych am gael mwy o fwynhad wrth yrru eich beic
• os ydych yn mwynhau gyrru mewn grwpiau

Beth sy’n rhan o’r cynllun gwell beiciwr

Ar ôl i chi ddod o hyd i hyfforddwr ar gyfer y cynllun gwell beiciwr:

• fe gewch chi asesiad gyrru i gael gwybod beth rydych yn gallu ei wneud yn dda
• fe gewch chi ‘dystysgrif cymhwysedd DSA’ os nad oes arnoch angen help o gwbl gan eich hyfforddwr
• efallai y cewch chi hyfforddiant pwrpasol i’ch helpu i fod yn un o’r beicwyr gorau ac i gael mwy o bleser wrth yrru

Bydd eich hyfforddwr yn yrrwr medrus dros ben ac yn awyddus i rannu ei wybodaeth a’i arbenigedd gyda chi

Bydd angen i chi ddod o hyd i hyfforddwr a dewis un er mwyn dechrau ar y cynllun. Bydd un o’r arbenigwyr oddi ar gofrestr yr Asiantaeth Safonau Gyrru (DSA) ar gyfer hyfforddwyr beiciau modur sydd wedi pasio’u prawf yn dod gyda’r hyfforddwr.

Hyfforddwyr y cynllun gwell beiciwr

Mae’r hyfforddwyr arbenigol sydd ar y rhestr:

• i gyd yn hyfforddwyr hynod fedrus
• wedi profi bod y sgiliau ganddynt i roi hyfforddiant o safon i chi
• yn cael eu gwirio’n rheolaidd er mwyn gwneud yn siŵr eu bod yn cynnal safon uchel
• yn awyddus i rannu eu harbenigedd gyda chi er mwyn i chi gael mwy o bleser wrth yrru eich beic

Faint mae’r cynllun gwell beiciwr yn ei gostio

Mae cost y cynllun yn amrywio o hyfforddwr i hyfforddwr ac o yrrwr i yrrwr, gan ddibynnu ar eu hanghenion.

Os na fydd angen hyfforddiant arnoch chi, daw’r broses i ben ar ôl yr asesiad – a byddwch wedyn yn gymwys i gael disgownt ar eich yswiriant

Bydd asesiad y cynllun gwell beiciwr yn canfod:

• beth ydych chi’n dda am ei wneud
• sut gall eich hyfforddwr eich helpu i gael mwy o bleser wrth yrru

Beth sy’n digwydd yn ystod asesiad y cynllun gwell beiciwr

Byddwch chi’n gyrru beic modur a’r hyfforddwr yn eich dilyn. Byddwch yn gyrru mewn gwahanol amodau ffordd a thraffig er mwyn i chi allu dangos eich sgiliau.

Bydd yr ymarfer hwn yn para digon i’ch hyfforddwr wneud asesiad cywir o’ch anghenion – ar gyfer y rhan fwyaf o bobl, bydd yn para rhwng awr a dwy awr.

Os nad oes arnoch angen hyfforddiant o gwbl

Os na fydd angen hyfforddiant o gwbl arnoch, daw’r broses i ben ar ôl hynny.

Fe gewch chi ‘dystysgrif cymhwysedd DSA’ a byddwch yn gymwys i gael disgownt ar yswiriant.

Yna fe allech ystyried symud ymlaen i gwrs gyrru safon uwch. Gallwch gael gwybod mwy am gyrsiau gyrru safon uwch drwy glicio’r ddolen isod.

Fe gewch chi gyngor arbenigol a gweld sut mae gloywi eich sgiliau

Os bydd angen rhywfaint o hyfforddiant arnoch, fe gewch chi’ch cynllun personol eich hun ar gyfer gloywi eich sgiliau.

Bydd y cynllun yn canolbwyntio ar yr elfennau a fydd yn eich helpu i gael mwy o bleser wrth yrru.

Beth mae’ch hyfforddiant yn ei gynnwys

Nid yw’r hyfforddiant yn dilyn yr agwedd bod un ateb yn addas i bawb – mae’r cyfan wedi’i deilwra’n arbennig ar eich cyfer chi.

Bydd eich hyfforddwr yn eich helpu gyda’r elfennau a fydd yn eich galluogi i gael mwy o bleser wrth yrru. Bydd yn rhoi cyngor arbenigol i chi ac yn dangos sut mae gwella eich sgiliau wrth wneud pethau fel y canlynol:

• troi corneli
• symud i mewn ac allan rhwng cerbydau
• darllen troeon
• newid safle ar y ffordd
• gyrru’n llyfn

Am faint mae’r hyfforddiant yn para

Fe gewch chi gymaint o hyfforddiant ag y bydd ei angen arnoch chi. Bydd strwythur eich hyfforddiant yn amrywio. Efallai y bydd rhai hyfforddwyr yn cynnig:

• cyrsiau drwy’r dydd
• sesiynau byrrach y gallwch eu dilyn dros sawl diwrnod er mwyn cyd-fynd â’ch anghenion

Mae’n syniad da holi pa opsiynau sydd ar gael wrth i chi ddewis eich hyfforddwr er mwyn gwneud yn siŵr y cewch chi’r fargen orau ar eich cyfer chi.

Beth sy’n digwydd ar ddiwedd eich hyfforddiant

Ar ôl i chi gael yr holl hyfforddiant y mae ei angen arnoch chi, fe gewch chi:

• adroddiad am eich sgiliau gyrru
• ‘tystysgrif cymhwysedd DSA’ – gallwch ddefnyddio’r dystysgrif hon i gael disgownt ar yswiriant

Mae’r rhan fwyaf o gwmnïau yswiriant beiciau modur yn rhoi disgownt i yrwyr a chanddynt ‘dystysgrif cymhwysedd DSA’

Ar ôl i chi gael ‘tystysgrif cymhwysedd DSA’:

• cysylltwch ag un o’r broceriaid yswiriant isod i gael dyfynbris llawn
• rhowch enw’r dystysgrif

Mae’r rhan fwyaf o gwmnïau yswiriant beiciau modur yn rhoi disgownt i yrwyr sydd â’r dystysgrif.

Broceriaid yswiriant sy’n noddi’r cynllun

Dyma’r broceriaid yswiriant sy’n noddi’r cynllun hwn:

• AA Insurance
• Bennett’s Insurance
• Bikesure
• Carole Nash
• Chandler Direct
• CIA insurance
• Devitt
• Direct Choice Insurance
• E Bike
• Express Insurance
• Hastings Direct
• Lexham
• MCE Insurance
• Motorcycle Direct
• Norwich Union Direct
• Premium Choice
• Rampdale
• Swinton Insurance

Yswirwyr sy’n cefnogi’r cynllun

Mae’r yswirwyr canlynol yn cefnogi’r cynllun:

• AXA
• Chaucer Insurance
• Equity Red Star
• Groupama
• Highway
• KGM
• Link/Zenith
• NIG
• Norwich Union
• Royal & Sun Alliance

Darparwyd gan the Driving Standards Agency